Donostiako Trinitate Plazak azken bi hamarkadetan jasan
dituen zoritxarreko interbentzioei, oraintsu aurkeztu den frontoia estaltzeko
lehiaketa gehitu behar zaie.
Honi erantzuna emateko asmoz, azpian sinatzen dugunok zera adierazi
nahi genuke:
1. Trinitate Plaza Arkitektura Modernoaren funtsesko lan
bat da. Bere egilea, Luis Peña Ganchegui (Oñati, 1926 - Donostia, 2009), euskal
arkitekto nabarmenak, nazioarteko ospea izan zuen, besteak beste, hau bezalako
lanegaitik.
2. Donostiako Alde Zaharreko muinean bertan kokatua,
Trinitate Plaza hiriaren irudi kolektiboaren eta izaeraren ezaugarri da.
Gipuzkoako hiriburuan euskal kirolak ospatzeko bereziki diseinatua izan zen
honek hainbat kultura eta gizarte agerraldi jaso ditu 1963. urtean burutu
zenetik. Bertan aurkitu du Jazzaldiak paregabeko agertokia, eta honi esker,
nazioarteko proiekzio zabalenetako bat duen hiri-espazioa bilakatu da Trinitate
Plaza.
3. Ulertezinak eta onartezinak egiten zaizkigu lan
preziatu honek behin eta berriz jasan behar izan dituen interbentzio iraingarriak,
bere jatorrizko izaera inola ere errespetatzen ez dutenak. Are gehiago kontuan
izanik DoCoMoMo erregistro iberikoan dauden espazio publiko gutxietako bat dela
plaza hau.
4. Trinitate Plazako frontoia estaltzearen aurka gaude.
Era berean, Luis Peña Ganchegui arkitektoak 60ko hamarkadan eman zion
jatorrizko izaera berreskuratzeko zentzuan ezik egiten diren beste ekimen edo esku-hartze
ere ez dugu onartzen.
5. Erakunde publikoei (Donostiako Udala, Eusko
Jaurlaritza) eskatzen diegu ondare-arkitektoniko eta hiri-ondare baliotsu hau
babes eta gorde dezaten, kalifikazio eta lege-babes gorenak emanez. Modu berean,
multzo hau itxuraldatu eta degradatzen duten elementuak kendu, eta plaza
jatorrizko izaerara bueltatuko duten interbentzio oro eskuhar dezaten eskatzen
diegu.
Eta horrela jasota gera dedin sinatzen dugu,
Donostian, 2015eko ekainaren 10ean,
No hay comentarios:
Publicar un comentario